قبل ما تنزل أي مظاهرة

قبل ما تنزل مظاهرة ويحصل فيها اشتباكات وإصابات وقبل ما تشيل مصاب وتجري بيه عشان تسعفه خد بالك الأول :-

-   ما تحاولش تعمل أي حاجة إنت مش متدرب عليها .. استعين بأي حد من اللي حواليك يكون عنده خبرة. 

-   ما تنقلش المصاب من مكانه إلا في حالة وجود خطر مباشر على حياته أو حياتك ، نقله بطريقة غلط ممكن يتسبب في وفاته .

-   اتأكد إن مفيش حاجة في فم المصاب بتسد الممر الهوائي وتأكد إنه بيتنفس قبل ما تحركه ، ولو بيتكلم أو واعي يبقى ممر الهواء مفتوح .

-   لو هتشيل المصاب لازم يتشال كله ككتلة واحدة يعني حافظ على استقامة ظهره وعنقه وباقي أجزاؤه قدر الإمكان ، ياريت لو أكثر من واحد يشيلوه وكإنه على نقالة ، ما تشيلوش من أطرافه الأربعة .

-  أي كسر في العمود الفقري بيعتبر خطر جدا وممنوع تحريك المصاب إلا من مسعفي الإسعاف ، لإن الحركة ممكن تؤدي لإصابة النخاع الشوكي وبالتالي شلل دائم .. في الحالة دي المسعفين لازم يكون عددهم أربعة ، واحد يسند الرأس والباقيين الجسم .

-  لو في نزيف شديد حاول توقف النزيف بسرعة قبل أي حاجة ، اضغط مباشرة على مكان النزيف برباط ضاغط أو أي حاجة في إيدك تلاقيها ، أو اخلع جاكيت أو قميص عنك واستخدمه .

-  لو النزيف في الساق أو الذراع  يبقى خليه مرفوع فوق مستوى القلب عشان تقلل النزيف .

-  لو النزيف مستمر اربط عليه رباط كمان فوق القديم وشده ( ما تشيلش القديم أبدا )

بس خلي بالك

   اتطمن كل شوية على أطراف المصاب ( إيده ورجله ) لازم تكون دافئة أو حرارتها طبيعية ويقدر يحركها ، لو باردة لازم تخفف الرباط شوية عشان تسمح للدم يوصل للأطراف ، لحد ما يوصل للمستشفى .

-  لو شكيت إن النزيف معاه كسر في مكان ما ، خفف ضغط الرباط على المكان المكسور بس ، لكن خلي الرباط عليه كنوع من الجبيرة لحين تجبيسه في المستشفى . 

- بالنسبة لإختناقات الغاز .. اخلط ابيكو جل بتاع الحموضة بضعفه مياه واغسل بيه

عين المصاب ووجهه ، ولو متاح   عندك إديله Hydrosafe عشان بيخفف ألم

العضلات وبيظبط كيميا الجسم اللى اتأثرت من الغاز ، كمان البيبسي بيخفف آلام

الوجه لو غسلته بيه وأحيانا بينهيها تماما لكن نبه المصاب إنه لو هيرجع للإشتباكات تاني فالبيبسي هيسبب ضرر أكثر لو اتعرض بعده للغاز ، ولو الأنف بينزل منها مخاط  إسود لازم المصاب يروح المستشفى فورا لإن ده معناه إن الرئة مصابة وممكن تحصل فيها جلطات ،، اللبن وأقراص فيتامين سي وأقراص الفحم كل دي مفيدة في تقليل آثار الغاز الضارة وامتصاصه من المعدة ..ولو في أي جروح اغسلها فورا بماء بارد قبل ما المسام تتفتح وتمتص الغاز .

الفيديو ده مفيد جدا في التعامل مع الغاز .. راجعوه كويس

http://www.youtube.com/watch?feature=player_embedded&v=D56nI9k1n3g 

     إذا حصل إغماء بسبب استنشاق كمية كبيرة من الغاز أو لأي سبب تاني ، في الحالة دي تجنب إنك تخلي المصاب فاقد الوعي على ظهره لإن ده هيصعب عليه عملية التنفس أكثر ، حاول تخليه على جنبه اليمين أو الشمال وخبط خبطات خفيفة على ظهره ، حاول توفر له مكان في هواء نظيف ومفتوح ، ولو في أي حاجة  ضيقة حول الرقبة أو الصدر فكها عنه ، لحين وصول الإسعاف .

- حاجة كمان مهمة جدا عشان الطفل اللي اتصاب بكسر في الجمجمة يوم 19 إبريل ،

ازاي تعرف إن في كسر حصل ؟ العلامة الوحيدة اللي هتشوفها بعينك وتخليك متأكد من وجود كسر هي انخفاض واضح لجزء من الجمجمة ..... غير كده ممكن تلاقي نزيف من الأذن أو الأنف أو حول العين ، تعثر في الكلام ، غثيان وقيء ، صعوبة في الرؤية ، فقدان وعي ، نزول سوائل عديمة اللون من الأنف أو الأذن ... دي كلها أعراض كسر الجمجمة وبتختلف حسب شدة الحالة ,, طيب نعمل إيه ؟؟  نطلب الإسعاف فورا ثم :- 

أولا : اتأكد إن المصاب بيتنفس وحاول توفر له تهوية جيدة قدر الإمكان ...

ثانيا .. ما تحاولش تحرك رأسه أو تلمس المكان المصاب بإيدك أو بأي آلة حادة إلا لو في حالة حدوث نزيف شديد مع الكسر حاول توقف النزيف بوضع قطعة قماش على المكان وما تشيلهاش أبدا ... 

ثالثا .. في حالة حدوث قيء مع كسر الجمجمة حاول تثبت رأس المصاب ورقبته على الجنب عشان ما تحصلش ( شرقة ) من القيء وبالتالي الإضرار بالتنفس ...

         

 ملحوظة :- أنا كتبت الإسعافات الأولية للإصابات المحتملة في الاشتباكات ، لو أي حد شايف إن في إصابات تانية بتتكرر يقوللي عليها عشان أضيف طريقة إسعافها .. يمكن يكون سبب في إنقاذ حياة .

 @horreiia